عمرك حسيت إن عندك اكتئاب؟ أو أي مرض نفسي تاني؟ أنت مش لوحدك؛ تقرير لمنظمة الصحة العالمية في 2001  بيقول إن المرض النفسي منتشر لدرجة إن شخص ما بين كل أربع أشخاص، هيصاب بمرض نفسي في حياته، لا مش بس كده ده في 450 مليون شخص في العالم مصاب بمرض نفسي حاليا، نفس التقرير وضح إن ثلثين الناس المصابة بمرض نفسي عمرهم ما بيتلقوا اهتمام صحي لأمراضهم؛ بسبب وصمة العار اللي بتصاحب أي شخص بيعاني من مرض نفسي في العالم كله.

الأمراض النفسية ممكن تجيلي أنا و أنت أو صاحبك أو بنتك أو أي حد،  زيها زي السرطان وحتى الانفلونزا، هي كمان أمراض خطيرة ومضاعفتها أخطر، لكن طبعًا إنت ممكن تتغلب عليها لو أنت عايز، وعلى فكرة فيه مشاهير كتير معظمنا بنحبهم قدروا يعملوا ده وتحدوا أمراضهم النفسية مافيش حاجة عطلتهم عن نجاحهم، زي:

1- أنجلينا جولي

في 2015، أنجلينا اتكلمت عن الاكتئاب اللي واجهته في مراهقتها، و كان سببه تربيتها في (لوس أنجلوس – كاليفورنيا)؛ لأنها اتربت مع ناس بيعتقدوا أن لو الشخص حلو وعنده فلوس وبيشتغل في التمثيل فهو عنده كل حاجة، ده خلى أنجلينا نفسها تصدق الحاجات دي واتفاجأت أنها ماكنتش عارفة تلاقي نفسها بعد ما حققت كل ده.

واحدة من مربيات أنجلينا قالت لموقع “Radar Online” أن أنجلينا عانت من مرض فقدان الشهية  في مراهقتها، وأنجلينا قالت إن العمل التطوعي وأولادها كان من أهم الحاجات اللي ساعدتها تتغلب على أمراضها النفسية.

2- الأمير هاري

بالرغم إن ناس كتير بتشوف إن المرض النفسي دا عار الأمير هاري ماتكسفش أنه يتكلم عن ازاي خسارة والدته في سن صغير و كبته لمشاعره لمدة 20 سنة كان له تأثير سلبي على صحته النفسية.

الأمير هاري مابينش المرض النفسي اللي كان بيعاني منه بس قال إنه كان بيعاني من نوبات غضب وهلع، كان الموضوع بيوصل بيه لاقتراب من انهيار عصبي معظم الأوقات، شجع الأمير هاري على اللجوء للاهتمام الطبي بما إنه كان نقطة تحول في حياته والتغلب على مشاكله النفسية.

3- أديل

في 2016، كانت أديل نجمة غلاف مجلة “Vanity Fair” لعدد ديسمبر، وفي حوارها مع المجلة اتكلمت عن أن بعد ما خلفت ابنها أنجيلو في 2012 عانت من “اكتئاب ما بعد الولادة” وهو مرض نفسي شائع بين الأمهات الجدد، أديل اختارت نوع مختلف من أنواع العلاج وهو مجموعة دعم مكونة من أمهات تانية بتعاني من نفس المرض بدلًا من الأدوية.

أديل نزلت ألبوم “25” في 2015 و كان اكتر ألبوم اتباع في 2015 و 2016، وكسب جايزة جرامي لألبوم السنة في 2017.

4- منى زكي

بعد وفاة والد منى زكي في 2008، اضطرت إنها توقف كل أعمالها و تروح لطبيب نفسي بسبب الحزن الشديد اللي واجهته ببسبب موت والدها. نجحت الممثلة في التغلب على حزنها بمساعدة طبيبها النفسي و شاركت في أفلام ناجحة زي احكي يا شهرزاد و 30 يوم، و خلفت ابنها الثاني “سليم” في 2014 و ابنها الثالث “يونس” في 2016 و قدرت تساند جوزها الممثل أحمد حلمي في التغلب على مرض السرطان.

5- غادة عبدالرازق

غادة عبدالرازق من أكتر النجوم العرب اللي بيتكلموا عن المرض النفسي و أهمية العلاج النفسي، غادة قالت إنها بتروح لدكتور نفسي بقالها 15 سنة و إن دي حاجة عادية و هى مش بتتكسف منها، وقالت إنها في أوقات بتاخد مهدئات للأعصاب عشان تعرف تتعامل مع الضغط النفسي و العصبي اللي بيحصلها بسبب مجال التمثيل. في رمضان 2013، قدمت غادة شخصية حياة مريضة انفصام في الشخصية في مسلسل حكاية حياة.

ياترى عرفت إن المرض النفسي مش عيب ومش حاجة نتكسف منها؟