الكبيرة : رشا الشامي

المعلم : أسامة الشاذلي

الشيوعية في الاداء

أنا قعدت فترة كبيرة من عمري فاهم كلمة ( شيوعية ) او الشخص ( الشيوعي ) غلط تماما وده يرجع لحاجات كتيرة منها حب المصريين للفتي وإعتبار ان ردهم علي أي سؤال بكلمة ( معرفش ) فيه إهانة كبيرة جدا للشخص اللي بيرد.

أول عهدي مع كلمة ( شيوعية ) كانت وانا في المدرسة مع فريق الكرة وإحنا بنلاعب مدرسة تانية ومغلوبين وبنلعب وحش وبعد صفارة الحكم بنهاية الشوط الأول والمدرب بتاعنا اللي هو مدرس الالعاب لاممنا حواليه ومتنرفز جدا علينا وبيقول اللعب كله أنانية مفيش اي ( شيوعية في الاداء ), طبعا احنا طلبة في اعدادي محدش فينا سأل الشيوعية في الاداء دي اللي هي إيه بس الكل فهم انها عكس انانية أكيد وزودت في قاموسي خلاص ان الشيوعية يعني أباصي للي جنبي.

لحد ما في سنة 1998 باتفرج علي ماتش أمريكا وإيران في كأس العالم مع ناس قرايبي منهم راجل كبير ومعروف في وسط العيلة بالوقار والاحترام  وراح قايل ان الماتش مهم عشان الخلافات بين امريكا وإيران علشان إيران شيوعيين عكس أمريكا فأنا قلتله هو شيوعيين يعني إيه يا عمو ؟ قال لي يعني مسلمين بس مش اوي ومبيحبوناش وبيشتموا الصحابة وبيحبوا سيدنا ( علي ) حتي تلاقي نص الفرقة اسمها (علي) أهو.

كبرت أنا بقي بعد كده وفهمت يعني ايه شيوعية ويعني إيه شيعة وعرفت ان مدرس الالعاب وعمو كانوا بيهجصوا وانهم مش فاهمين حاجة والموضوع بقي عادي جدا لحد من فترة قريبة كنت عند واحد صاحبي في المحل بتاعه في حتة شعبية أوي في المنصورة وقال لواحد معدي في الشارع يندهلنا محمد الشيوعي بتاع القهوة يشوف هنشرب إيه. أنا استغربت شوية ان حد قهوجي يكون لقبه ( الشيوعي ) وجه في بالي نموذج اليساري المثقف الفقير وكده وفعلا جه محمد الشيوعي ولد شكله بسيط جدا في لبسه وكان مميز فيه انه عدو الشمس أو ألبينو – اللي بيكون لون جلده وشعره فاتح جدا لدرجة البياض – فاتكلمت معاه كلمتين لقيته مفيش خالص ومش متعلم اصلا وأغلب من الغلب فسألت صاحبي هو اسمه الشيوعي ليه يعني ده ميعرفش الهوا عن الشيوعية ؟ تطوع اللي شغال في المحل عند صاحبي ورد : مش شيوعي ازاي بس يا باشا ؟ انت مش شايف وشه وشعره وحواجبه ؟ ده كله شيوعية أهو !!! فهمت من صاحبي بعد كده ان المتواتر في الحتة عندهم ان هي دي الشيوعية بالنسبة لسكان المنطقة هناك وطبعا محاولتش اقولهم ان الكلام ده مش صح لا تطلع هي دي الشيوعية في الاخر وانا اللي مش فاهم.     




 تعليقاتكم

  1. هههههههههه يسلم فمك يا باشا …
    طريقة سردك وحكايتك هايله … تحياتي، لكن كنت حابب لو تضيف في الأخر، ما هي الشيوعية من وجهة نظرك انت، ولا خفت تقول لحسن تطلع عند الكل مختلفه !! هههههههههه

Your email address will not be published. Required fields are marked *

*

احدث الافلام حصريا ومجانا